סידור אשכנז, שבת, ליל שבת, אשת חילSiddur Ashkenaz, Shabbat, Shabbat Evening, Eshet Chayil
א׳אֵֽשֶׁת־חַֽיִל מִי יִמְצָא וְרָחֹק מִפְּ֒נִינִים מִכְרָהּ:
1
ב׳בָּֽטַח בָּהּ לֵב בַּעְלָהּ וְשָׁלָל לֹא יֶחְסָר:
2
ג׳גְּמָלַֽתְהוּ טוֹב וְלֹא־רָע כֹּל יְמֵי חַיֶּֽיהָ:
3
ד׳דָּרְ֒שָׁה צֶֽמֶר וּפִשְׁתִּים וַתַּֽעַשׂ בְּחֵֽפֶץ כַּפֶּֽיהָ:
4
ה׳הָיְ֒תָה כָּאֳנִיּוֹת סוֹחֵר מִמֶּרְחָק תָּבִיא לַחְמָהּ:
5
ו׳וַתָּֽקָם בְּעוֹד לַֽיְלָה וַתִּתֵּן טֶֽרֶף לְבֵיתָהּ וְחֹק לְנַעֲרֹתֶֽיהָ:
6
ז׳זָמְ֒מָה שָׂדֶה וַתִּקָּחֵֽהוּ מִפְּ֒רִי כַפֶּֽיהָ נָֽטְ֒עָה כָּֽרֶם:
7
ח׳חָגְ֒רָה בְּעוֹז מָתְנֶֽיהָ וַתְּ֒אַמֵּץ זְרוֹעֹתֶֽיהָ:
8
ט׳טָעֲמָה כִּי־טוֹב סַחְרָהּ לֹא־יִכְבֶּה בַּלַּֽיְלָה נֵרָהּ:
9
י׳יָדֶֽיהָ שִׁלְּ֒חָה בַכִּישׁוֹר וְכַפֶּֽיהָ תָּֽמְ֒כוּ פָֽלֶךְ:
10
י״אכַּפָּהּ פָּרְ֒שָׂה לֶעָנִי וְיָדֶֽיהָ שִׁלְּ֒חָה לָאֶבְיוֹן:
11
י״בלֹא־תִירָא לְבֵיתָהּ מִשָּֽׁלֶג כִּי כָל־בֵּיתָהּ לָבֻשׁ שָׁנִים:
12
י״גמַרְבַדִּים עָֽשְׂ֒תָה־לָּהּ שֵׁשׁ וְאַרְגָּמָן לְבוּשָׁהּ:
13
י״דנוֹדָע בַּשְּׁ֒עָרִים בַּעְלָהּ בְּשִׁבְתּוֹ עִם־זִקְנֵי־אָֽרֶץ:
14
ט״וסָדִין עָשְׂ֒תָה וַתִּמְכֹּר וַחֲגוֹר נָתְ֒נָה לַכְּנַעֲנִי:
15
ט״זעוֹז־וְהָדָר לְבוּשָׁהּ וַתִּשְׂחַק לְיוֹם אַחֲרוֹן:
16
י״זפִּֽיהָ פָּתְ֒חָה בְחָכְמָה וְתוֹרַת־חֶֽסֶד עַל־לְשׁוֹנָהּ:
17
י״חצוֹפִיָּה הֲלִיכוֹת בֵּיתָהּ וְלֶֽחֶם עַצְלוּת לֹא תֹאכֵל:
18
י״טקָֽמוּ בָנֶֽיהָ וַיְאַשְּׁ֒רֽוּהָ בַּעְלָהּ וַיְהַלְ֒לָהּ:
19
כ׳רַבּוֹת בָּנוֹת עָֽשׂוּ חָֽיִל וְאַתְּ עָלִית עַל־כֻּלָּֽנָה:
20
כ״אשֶֽׁקֶר הַחֵן וְהֶֽבֶל הַיֹּֽפִי אִשָּׁה יִרְאַת־יְהֹוָה הִיא תִתְהַלָּל:
21
כ״בתְּנוּ־לָהּ מִפְּ֒רִי יָדֶֽיהָ וִיהַלְ֒לֽוּהָ בַשְּׁ֒עָרִים מַעֲשֶֽׂיהָ:
22
