חכמת שלמה י״גThe Wisdom of Solomon 13
א׳אָמְנָם כֵּן הוּא. אַךְ לַהֶבֶל דָּמוּ בְנֵי אָדָם אֲשֶׁר אֵין בָּם דַּעַת אֱלֹהִים. כִּי אֵינָם יוֹדְעִים אֶת יְיָ וְטוּבוֹ לְנֶגֶד עֵינֵיהֶם לֹא הִכִּירוּ אֶת הַיֹּצֵר וְאִם הִבִּיטוּ אֶל מַעֲשָׂיו:
1
ב׳וַיְהִי לְהֵפֶךְ. כִּי אָמְרוּ אֵשׁ אוֹ רוּחַ אוֹ סַעַר אוֹ חוּג הַכּוֹכָבִים אוֹ מַיִם שֹׁטְפִים אוֹ מְאוֹרוֹת הַשָּׁמַיִם הֵם הָאֱלֹהִים הַמֹּשְׁלִים בָּאָרֶץ:
2
ג׳וְאִם תִּפְאֶרֶת דְּבָרִים אֵלֶּה הִשִּׁיאָם לְהַאֲמִין כִּי אֱלֹהִים הֵם. אֵיךְ לֹא הֵבִינוּ מָה רָם אֲשֶׁר מִמַּעַל לָהֶם אֲדוֹן הַתִּפְאֶרֶת אֲשֶׁר עָשָׂם:
3
ד׳וְאִם עַל כֹּחָם וּגְבוּרָתָם תָּמָהוּ. מַדּוּעַ לֹא הִשְׂכִּילוּ מָה רַב כֹּחַ יוֹצְרָם:
4
ה׳כִּי בְּהִתְמַשֵּׁל הַיּוֹצֵר אֶל מַעֲשָׂיו. מִכֹּחַ כֻּלָּם וּמִתִּפְאַרְתָּם יֵרָאֶה דְּמוּת כְּבוֹדוֹ:
5
ו׳וּפֶן תֹּאמַר לֹא יֶאְשְׁמוּ עַל זֹאת. כִּי אֶת יְיָ בִּקְשׁוּ וְלָבֹא עַד תְּכוּנָתוֹ חָפְצוּ וַיִכָּשֵׁלוּ:
6
ז׳כִּי עוֹדָם תָּרִים בְּמִפְעֲלוֹתָיו נִלְכְּדוּ לְמַרְאֵה עֵינֵיהֶם. כִּי טוֹבִים הָיוּ כָּל הַדְּבָרִים אֲשֶׁר רָאוּ:
7
ח׳לֹא כֵן הוּא. וְלֹא יְכֻפַּר לָהֶם הַדָּבָר הַזֶּה:
8
ט׳כִּי אִם יָסְפוּ דַּעַת וַיָבִינוּ מוֹסְדוֹת הָאָרֶץ. עַל מֶה לֹא הִשִּׂיגוּ חִישׁ מַהֵר אֶת אָדוֹן כָּל הַמַּעֲשִׂים הָאֵל:
9
י׳וְאֵלֶּה נִבְזִים כֻּלָּם אֲשֶׁר קָרְאוּ בְּשֵׁם אֱלֹהִים לְכָל מַעֲשֵׂה יְדֵי אָדָם. זָהָב וָכֶסֶף הֶעָשׂוּי בְּכָל מְלֶאכֶת מַעֲשֶׂה. תַּבְנִית כָּל חַיָּה וְאֶבֶן דּוּמָם אֲשֶׁר פָּסְלוּ קַדְמוֹנִים וַיָשִׂימוּ כִסְלָם בִּדְבָרִים מֵתִים:
10
י״אוּכְמוֹ כֵן חָרָשׁ עֵצִים יִכְרָת לוֹ עֵץ רַעֲנָן וִיפַצְּלֵהוּ מִסָּבִיב לוֹ. וְיַעַשׂ מֵחֶצְיוֹ כָּל כֶּלִי לְצָרְכֵי בֵיתוֹ:
11
י״בוְעַל חֶצְיוֹ יְבַשֵּׁל בְּשַׂר אֲרוּחָתוֹ לִשְׂבֹּעַ:
12
י״גוּשְׁאֵרִיתוֹ אֲשֶׁר לֹא יִצְלַח לַכֹּל מְעֻקָּל וְרָקָב בּוֹ. כְּכַלֹּתוֹ אֶת מְלַאכְתּוֹ יַקְצִיעֵהוּ וִיתָאֲרֵהוּ כְּחָכְמָתוֹ וְיַעֲשֵׂהוּ כְּתַבְנִית אִישׁ:
13
י״דאוֹ יַעֲשֵׂהוּ כְּתַבְנִית חַיָּה רָעָה. בַּשָּׁנִי יְיַפֵּהוּ וּבַצְּבָעִים יְכַסֶּה אֶת כְּתָמָיו:
14
ט״ויַעֲשֶׂה בַּיִת לִכְבוֹדוֹ. וְיוֹשִׁיבֵהוּ אֶל הַחוֹמָה וִיחַזְּקֵהוּ בַּבַּרְזֶל:
15
ט״זהֵטִיב לִרְאוֹת לְהָכִין פִּסְלוֹ בַּל יִמּוֹט. יָדַע כִּי לֹא יוּכַל מַלֵּט נַפְשׁוֹ כִּי פֶסֶל הוּא וְעַל זוּלָתוֹ יִשָּׁעֵן:
16
י״זוְלֹא יִכָּלֵם לְהִתְפַּלֵּל אֵלָיו בְּעַד קִנְיָנָיו בְּעַד אִשְׁתּוֹ וּבְעַד בָּנָיו. וּלְדַבֵּר לְדָבָר אֲשֶׁר כָּל רוּחַ אֵין בּוֹ:
17
י״חיִתְחַנֵּן אַל הֶחָלָשׁ לֵאמֹר רְפָאֵנִי. יֶעְתַּר לַמֵּת הַחַיֵינִי יְבַקֵּשׁ עֶזְרָה מִלֹּא יָדַע עַד מָה:
18
י״טיִשְׁאַל עַל דַּרְכּוֹ מֵאֲשֶׁר לֹא יָמִישׁ מִמְּקוֹמוֹ. וּמֵאֲשֶׁר לֹא יְמַשֵּׁשׁ יִשְׁאַל כֹּחַ לַעֲשׂוֹת חָיִל לַעֲבֹד עֲבוֹדָה וְלִהְיוֹת אָמָן:
19