ילקוט שמעוני על התורה קס״חYalkut Shimoni on Torah 168
א׳וַיִּבְרַח מֹשֶׁה מִפְּנֵי פַּרְעֹה, כְּתִיב (ישעיה כו, כ) "לֵךְ עַמִּי בֹּא בַחֲדָרֶיךָ", בְּשָׁעָה שֶׁאַתָּה רוֹאֶה הַשָּׁעָה חֲצוּפָה, לֹא תַּעֲמֹד כְּנֶגְדָּהּ, אֶלָּא תֵּן לָהּ מָקוֹם, הִסְתַּכְּלוּ בִּי כִּבְיָכוֹל, כְּשֶׁרָאִיתִי הַשָּׁעָה חֲצוּפָה בַּעֲוֹנוֹתֵיכֶם, נָתַתִּי לָהּ מָקוֹם, שֶׁנֶּאֱמַר (איכה ב, ג) "הֵשִׁיב אָחוֹר יְמִינוֹ". וְכָל מִי שֶׁעוֹמֵד כְּנֶגֶד הַשָּׁעָה נוֹפֵל בְּיָדָהּ, וְכָל מִי שֶׁנּוֹתֵן מָקוֹם לַשָּׁעָה הַשָּׁעָה נוֹפֶלֶת בְּיָדוֹ. נָבוֹת עָמַד כְּנֶגֶד הַשָּׁעָה וְנָפַל [בְּיָדָהּ]. אַבְרָהָם נָתַן מָקוֹם לַשָּׁעָה וּבָרַח מִפְּנֵי נִמְרֹד, וְנָפְלָה בְּיָדוֹ. יִצְחָק נָתַן מָקוֹם לַשָּׁעָה, וְנָפְלָה בְּיָדוֹ, שֶׁנֶּאֱמַר (בראשית כו, כו) "וַאֲבִימֶלֶךְ הָלַךְ אֵלָיו מִגְּרָר". מֹשֶׁה נָתַן מָקוֹם לַשָּׁעָה, שֶׁנֶּאֱמַר וַיִּבְרַח מֹשֶׁה מִפְּנֵי פַרְעֹה, וְחָזְרָה הַשָּׁעָה וְנָפְלָה בְּיָדוֹ, שֶׁנֶּאֱמַר "גַּם הָאִישׁ מֹשֶׁה גָּדוֹל מְאֹד וְגוֹ' בְּעֵינֵי עַבְדֵי פַרְעֹה". דָּוִד נָתַן מָקוֹם לַשָּׁעָה, (שמואל א כ, א) "וַיִּבְרַח דָּוִד מִנָּיוֹת", חָזְרָה הַשָּׁעָה וְנָפְלָה בְּיָדוֹ, וְאָמַר לוֹ שָׁאוּל, "יָדַעְתִּי כִּי מְלֹךְ תִּמְלוֹךְ". וְכֵן יַעֲקֹב נָתַן מָקוֹם לַשָּׁעָה, "וַיִּבְרַח יַעֲקֹב שְׂדֵה אֲרָם", וְנָפְלָה הַשָּׁעָה בְּיָדוֹ, (בראשית לו, ו) "וַיִּקַּח עֵשָׂו אֶת נָשָׁיו" וְגוֹ'.
1
ב׳וַיְהִי כִּמְלוֹךְ פַּרְעֹה עַל מִצְרַיִם וַיַּכְבֵּד לִבּוֹ עַל כָּל יוֹשְׁבֵי אַרְצוֹ וְגַם עַל בֵּית יַעֲקֹב לֹא חָמַל בַּעֲצַת בִּלְעָם הַקּוֹסֵם וּשְׁנֵי בָּנָיו, כִּי יוֹעֲצִים לַמֶּלֶךְ הָיוּ בַּיָּמִים הַהֵם, וַיִּוָעֵץ הַמֶּלֶךְ אֶת שְׁלֹשֶׁת יוֹעֲצָיו (שמות א, ט) "וַיֹּאמֶר הִנֵּה עַם בְּנֵי יִשְׂרָאֵל" וְגוֹ', וַיַּעַן רְעוּאֵל הַמִּדְיָנִי אֶת הַמֶּלֶךְ, אִם עַל הַמֶּלֶךְ טוֹב אַל תִּשְׁלַח יָדְךָ בָּם, כִּי אֱלֹהֵיהֶם בָּחַר בָּם מִימֵי קֶדֶם וַיִּקָּחֵם לְחֶבֶל נַחֲלָתוֹ מִכָּל גּוֹיֵי הָאָרֶץ, וּמִי בְּכָל מַלְכֵי הָאָרֶץ אֲשֶׁר שָׁלַח יָדוֹ בָּם וְנִקָּה וְלֹא עָשָׂה בוֹ אֱלֹהֵימוֹ נָקָם. הֲלֹא בְּרֶדֶת אַבְרָהָם מִצְרַיְמָה וַיְצַו פַּרְעֹה לָקַחַת אֶת שָׂרַי אִשְׁתּוֹ וַיְנַגְּעֵהוּ ה' נְגָעִים גְּדוֹלִים עַד אֲשֶׁר הֵשִׁיב אֶת אִשְׁתּוֹ. גַּם לַאֲבִימֶלֶךְ הַגְּרָרִי הוֹכִיחַ בְּעֹצֶר כָּל רֶחֶם וְהֵשִׁיב לוֹ אִשְׁתּוֹ. אַף אֶל יִצְחָק הִפְלִיא פְּלָאָיו בְהִגָּרְשׁוֹ מִגְּרָר וַיִּתְיַבְּשׁוּ כָּל מוֹצָאֵי מֵימֶיהָ, וַעֲצֵי תְּנוּבָתָם לֹא צִמְּחוּ, וּשְׁדֵי נְשֵׁיהֶם וּבְהֶמְתָּם צָמָקוּ, וַיֵּלֶךְ אֵלָיו אֲבִימֶלֶךְ מִגְּרָר וַאֲחֻזַּת מֵרֵעֵהוּ וּפִיכֹל שַׂר צְבָאוֹ וְקָדוּ לוֹ אַרְצָה וַיְבַקְּשׁוּ מִמֶּנּוּ תְּחִנָּה, וַיִּתְפַּלֵּל עֲלֵיהֶם אֶל ה' וַיֶּעְתַּר לוֹ וַיְרַפֵּא אוֹתָם. יַעֲקֹב אִישׁ תָּם הֻצַּל בְּתֻמּוֹ מִיַּד עֵשָׂו וְלָבָן הָאֲרַמִּי וּמִיַּד כָּל מַלְכֵי כְּנַעַן, וּמִי הוּא אֲשֶׁר שָׁלַח בָּהֶם יָדוֹ וְנִקָּה, וַהֲלֹא אָבִיךָ גִּדֵּל אֶת יוֹסֵף עַל כָּל כָּל חָכְמָתוֹ וּמִלֵּט כָּל שׁוֹכְנֵי אָרֶץ מִן הָרָעָב, וַיְצַו לְהוֹרִיד יַעֲקֹב מִצְרַיְמָה לְמַעַן תִּמָּלֵט אֶרֶץ מִצְרַיִם מֵרָעָב, וְעַתָּה אִם טוֹב בְּעֵינֶיךָ, חֲדַל מֵהַשְׁחִיתָם, וְאִם אֵין בְּלִבְּךָ לְהוֹשִׁיבָם בְּמִצְרַיִם, שְׁלַח אוֹתָם מִזֶּה וְיֵלְכוּ לְאֶרֶץ כְּנַעַן. וַיִּחַר אַף פַּרְעֹה, וַיִּבְרַח (מֹשֶׁה) [יִתְרוֹ] וַיִּמָלֵט מִדְיָנָה, וּמַטֵּה יוֹסֵף לָקַח בְּיָדוֹ. וַיֹּאמֶר הַמֶּלֶךְ לְאִיּוֹב הָעוּצִי, מַה יֵּעָשֶׂה בְּאֵלֶּה, וַיֹּאמֶר לוֹ הֲלֹא כָּל יוֹשְׁבֵי אַרְצְךָ בְּיָדְךָ, כַּטּוֹב בְּעֵינֶיךָ עֲשֵׂה. וַיֹּאמֶר בִּלְעָם הַפְּתוֹרִי לַמֶּלֶךְ, אִם בְּלַהֶבֶת אֵשׁ תֹּאמַר לְהַמְעִיטָם, הֲלֹא אֱלֹהֵימוֹ מִלֵּט אֶת אַבְרָהָם מֵאוּר כַּשְׂדִּים. וְאִם בְּחֶרֶב תֹּאמַר לְהַשְׁמִידָם, הֲלֹא יִצְחָק בָּא לְהֵאָסֵף וַיִּתֵּן אַיִל תַּחְתָּיו. וְעַתָּה אֲדוֹנִי הַמֶּלֶךְ אִם תְּבַקֵּשׁ לִמְחוֹת אֶת שְׁמָם, צַוֵּה לְהַטִּיל יַלְדֵיהֶן הַמַּיְמָה, כִּי לֹא נִסָּה אֶחָד מֵהֶם בְּזֶּה, וַיִּיטַב הַדָּבָר בְּעֵינֵי הַמֶּלֶךְ וַיַּעַשׁ כֵּן. וַיְהִי כַּאֲשֶׁר גָּדַל מֹשֶׁה בְּבֵית הַמֶּלֶךְ, וַתַּחְשְׁבֵהוּ בַּת פַּרְעֹה לְבֵן, וַיִּירְאוּ מִפָּנָיו כָּל בֵּית פַּרְעֹה. וַיְהִי הַיּוֹם וַיֻּגַּד לְבִּלְעָם לֵאמֹר, הִנֵּה בֶּן בַּתְיָה מְבַקֵּשׁ לְהָרְגְךָ, וַיִּבְרַח בִּלְעָם הַקּוֹסֵם וּשְׁנֵי בָּנָיו אִתּוֹ וַיָּנֻסוּ וַיְמַלְּטוּ אֶת נַפְשָׁם וַיֵּלְכוּ אֶרֶץ כּוּשׁ. בַּיָּמִים הָהֵם נִהְיְתָה מִלְחָמָה בֵּין כּוּשׁ וּבֵין בְּנֵי קֶדֶם וַיֵּצֵא קוֹקְנוּס מֶלֶךְ כּוּשׁ לְהִלָּחֵם בַּאֲרָם וּבִּבְנֵי קֶדֶם, וַיַּעֲזֹב אֶת בִּלְעָם הַקּוֹסֵם הוּא לָבָן הָאֲרַמִּי מִפְּתוֹר, וּשְׁנֵי בָּנָיו יִנוּס וְיַמְבְּרוּס, לִשְמֹר אֶת הָעִיר וְדַלַּת הָאָרֶץ אִתּוֹ, וַיִּוָּעֵץ בִּלְעָם אֶת עַם הָאָרֶץ לִמְרֹד בַּמֶּלֶךְ קוֹקְנוּס לְבִלְתִּי בּוֹא הָעִירָה, וַיִּשְׁמְעוּ אֵלָיו עַם הָאָרֶץ, וַיִּשָּׁבְעוּ לוֹ וַיַּמְלִיכֻהוּ עֲלֵיהֶם, וְאֶת בָּנָיו הִפְקִידוּ לְשָׂרֵי צְבָאוֹת, וַיַּגְבִּיהוּ אֶת הַחוֹמוֹת מְאֹד מִשְּׁנֵי צִדֵּי הָעִיר, וּמִן הָעֵבֶר הַשְּׁלִישִׁי חָפְרוּ בְּאֵרוֹת רַבּוֹת אֵין מִסְפָּר בֵּין הָעִיר וּבֵין הַנָּהָר הַסּוֹבֵב אֶת כָּל אֶרֶץ כּוּשׁ, וַיַּבְקִיעוּ שָׁם אֶת מֵי הַנָּהָר. וּמִן הָעֵבֶר הָרְבִיעִי קִבְּצוּ נְחָשִׁים לָרֹב מְאֹד בְּלַחֲשֵׁיהֶם וּבְכִשְׁפֵיהֶם וְאֵין יוֹצֵא וּבָא אֲלֵיהֶם. וַיְהִי כְּשׁוּב הַמֶּלֶךְ וְכָל שָׂרֵי הַחֲיָלוֹת מִן הַמִּלְחָמָה, וַיִּשְּׂאוּ עֵינֵיהֶם וַיִּרְאוּ אֶת חוֹמוֹת הָעִיר כִּי גָּבְהוּ מְאֹד, וַיֹּאמְרוּ, רָאֹה רָאוּ כִּי אֵחַרְנוּ בַּמִּלְחָמָה וַיַּגְבִּיהוּ אֶת חוֹמוֹת הָעִיר וַיַּחֲזִיקוּם לְבִלְתִּי בּוֹא עֲלֵיהֶם מַלְכֵי כְּנַעַן לַמִּלְחָמָה. וַיְהִי כַּאֲשֶׁר קָרְבוּ אֶל הָעִיר וַיִּרְאוּ וְהִנֵּה שַׁעֲרֵי הָעִיר סְגוּרִים, וַיִּקְרְאוּ אֶל הַשּׁוֹעֲרִים לֵאֱמֹר, פִּתְחוּ לָנוּ וְנָבוֹאָה הָעִירָה. וַיְמָאֲנוּ הַשּׁוֹעֲרִים לִפְתֹּחַ לָהֶם בְּמִצְוַת בִּלְעָם הַקּוֹסֵם, וְלֹא נְתָנוּם לָבֹא הַשַּׁעְרָה וַיַּעַרְכוּ מִלְחָמָה נֹכַח הַשַּׁעְרָה, וַיִּפֹּל מֵחֵיל קוֹקְנוּס בַּיּוֹם הַהוּא מֵאָה וּשְׁלוֹשִׁים אִישׁ. וַיְהִי בַּיּוֹם הַשֵּׁנִי וַיִּלָּחֲמוּ מֵעֵבֶר הַנָּהָר, וַיָּבֹא שְׁלֹשִׁים רֹכְבֵי הַפָּרָשִׁים בַּיָּמִים הָהֵמָּה וְלֹא יָכוֹלוּ וַיִּטְבְּעוּ בְּתוֹךְ הַבּוֹרוֹת וַיָּמוּתוּ. וַיְצַו הַמֶּלֶךְ לַחֲטֹב עֵצִים לַעֲשוֹת רַפְסוֹדוֹת לַעֲבֹר עֲלֵיהֶם, וַיַּעֲשׂוּ. וַיְהִי בְּבוֹאָם אֶל מְקוֹם הַבּוֹרוֹת, הָיוּ הַמַּיִם מִתְגַּלְגְּלִים בְרֵחַיִם. וַיִּטְבְּעוּ בַּיּוֹם הַהוּא מָאתַיִם אִישׁ עַל עֶשֶׂר רַפְסוֹדוֹת. וַיְהִי בַּיּוֹם הַשְּׁלִישִׁי, וַיָּבוֹאוּ מִצַּד הַנְּחָשִׁים וְלֹא יָכְלוּ לָגֶשֶׁת שָׁמָּה, וַיַּהַרְגוּ הַנְּחָשִׁים מֵאָה וְשִׁבְעִים אִישׁ, וַיַּחְדְּלוּ לְהִלָּחֵם עַל כּוּשׁ. וַיְהִי בִּהְיוֹת הַמָּצוֹר עַל כּוּשׁ, וַיִּבְרַח מֹשֶׁה מִמִּצְרַיִם וַיָּבֹא אֶל מַחֲנֵה קוֹקנוּס מֶלֶךְ כּוּשׁ, וּמֹשֶׁה בֶּן שְׁמוֹנֶה עֶשְׂרֵה שָׁנָה בְּבָרְחוֹ, וְהַיָּמִים אֲשֶׁר צָר קוֹקְנוּס עַל כּוּשׁ, תֵּשַׁע שָׁנִים, וַיְהִי הַבָּחוּר הוֹלֵךְ וּבָא עִמָּהֶם וַיֶּאֱהַב הַמֶּלֶךְ וְהַשָּׂרִים וְכָל חֵיל הַמִּלְחָמָה אֶת הַבָּחוּר כִּי רַב וְיַקִּיר הוּא, וְקוֹמָתוֹ כְּאֶרֶז וּפָנָיו כְּצֵאת הַשֶּׁמֶשׁ, וְכֹחַ גְּבוּרָתוֹ כַּאֲרִי, וַיְהִי יוֹעֵץ לַמֶּלֶךְ. וַיְהִי מִקֵּץ תֵּשַׁע שָׁנִים וַיֶּחֱלֶה הַמֶּלֶךְ אֶת חָלְיוֹ אֲשֶׁר יָמוּת בּוֹ, וַיְהִי בַּיּוֹם הַשְּׁבִיעִי לְעֵת חֲלוֹתוֹ, וַיָּמָת, וַיַּחְנְטֻהוּ עֲבָדָיו וַיִּקְבְּרֻהוּ נֹכַח שַׁעַר הָעִיר הַפּוֹנֶה אֶרֶץ מִצְרַיִם וַיִבְנוּ עָלָיו בִּנְיָן גָּדוֹל נָאֶה וְגָבוֹהַ מְאֹד, וַיִּכְתְּבוּ עָלָיו כָּל מִלְחֲמוֹתָיו וְכָל גְּבוּרוֹתָיו. וַיְהִי אַחֲרֵי הִשְׁלִימוּ הַבִּנְיָן, וַיֹּאמְרוּ אִישׁ אֶל רֵעֵהוּ מַה נַּעֲשֶׂה, אִם אָמַרְנוּ נִלָחֲמָה הָעִירָה, וְיִפְּלוּ מִמֶּנּוּ חֲלָלִים רַבִּים, וְאִם אָמַרְנוּ נֵשֵׁב בְּמָצוֹר, וְשָׁמְעוּ כָּל מַלְכֵי אֲרָם וּבְנֵי קֶדֶם כִּי מֵת מַלְכֵּנוּ וְיָבֹאוּ עָלֵינוּ פִּתְאֹם וְלֹא יַשְׁאִירוּ לָנוּ שָׂרִיד, וְעַתָּה לְכוּ וְנַמְלִיכָה עָלֵינוּ מֶלֶךְ וְנֵשֵׁב בְּמָצוֹר עַד תִּנָּתֵן הָעִיר בְּיָדֵנוּ. וַיְמַהֲרוּ וַיַּפְשִׁיטוּ אִישׁ לְבוּשׁוֹ וַיַשְׁלִיכוּ אַרְצָה, וַיַּעֲשׂוּ בָּמָה גְּדוֹלָה וַיוֹשִׁיבוּ עָלֶיהָ אֶת מֹשֶׁה, וַיִּתְקְעוּ בַּשּׁוֹפָרוֹת וַיֹּאמְרוּ יְחִי הַמֶּלֶךְ יְחִי הַמֶּלֶךְ, וַיִּשָּׁבְעוּ כָּל הַשָּׂרִים וְכָל הָעָם לָתֵת לוֹ אֶת הַכּוּשִׁית הַגְּבִירָה אֵשֶׁת קוֹקְנוּס לוֹ לְאִשָּׁה וַיַמְלִיכוּ אוֹתוֹ עֲלֵיהֶם. וּמֹשֶׁה בֶּן שֶׁבַע וְעֶשְׂרִים שָׁנָה בְּמָלְכוֹ עַל בְּנֵי כּוּשׁ. וַיְהִי בַּיּוֹם הַשֵּׁנִי לְמָלְכוֹ, וַיִּוָעֲדוּ כֻּלָּם לִפְנֵי מֹשֶׁה וַיֹּאמְרוּ לוֹ, אִם עַל הַמֶּלֶךְ טוֹב הָבָה לָנוּ עֵצָה מַה נַּעֲשֶׂה, כִּי זֶה תֵּשַׁע שָׁנִים לֹא רָאִינוּ אֶת נָשֵׁינוּ וְאֶת בָּנֵינוּ וַנֵּשֵׁב בְּמָצוֹר. וַיַּעַן הַמֶּלֶךְ אֶת הָעָם וַיֹּאמֶר אִם תִּשְׁמְעוּ בְּקוֹלִי דְּעוּ כִּי תִּנָּתֵן הָעִיר בְּיָדֵינוּ, וְעַתָּה אִם נִלְחֹם נִלָּחֵם בָּהֶם, וְיִפְּלוּ מִמֶּנּוּ כְּבָרִאשׁוֹנָה, וְאִם אָמַרְנוּ נָבֹא הָעִיר, וְיִטְבְּעוּ מִמֶּנּוּ כְּבָרִאשׁוֹנָה, עַתָּה לְכוּ הַיַּעְרָה וְהָבִיאוּ מִבְּנֵי הַחֲסִידָה אִישׁ אֶפְרוֹחוֹ בְּיָדוֹ, וַיַּעֲשׂוּ כִּדְבַר הַמֶּלֶךְ. וַיְהִי כַּאֲשֶׁר גָּדְלוּ בְּנֵי הַחֲסִידָה וַיְצַו הַמֶּלֶךְ לְהַרְעִיבָם יָמִים שְׁנַיִם, וַיַּעַשׁ הָעָם כֵּן. וַיְהִי בַּיּוֹם הַשְּׁלִישִׁי וַיֹּאמֶר הַמֶּלֶךְ אֲלֵיהֶם, לִבְשׁוּ אִישׁ כְּלִי מִלְחַמְתּוֹ בְּיָדוֹ וְרִכְבוּ אִישׁ עַל סוּסוֹ וּקְחוּ אִישׁ אֶפְרוֹחוֹ בְּיָדוֹ וְנָקוּמָה וְנִלָחַמָה בְּעִיר מְקוֹם אַשֶׁר הַנְחָשִׁים שָׁם, וַיַּעֲשׂוּ כִּדְבַר הַמֶּלֶךְ. וַיְהִי בְּהַגִּיעָם אֶל מְקוֹם הַנְּחָשִׁים, וַיֹּאכְלוּם וַיַּשְׁבִּיתוּם מִן הַמָּקוֹם הַהוּא. וַיְהִי כִּרְאוֹת הַמֶּלֶךְ וְהָעָם כִּי נִשְׁבְּתוּ הַנְּחָשִׁים, וַיָּרִיעוּ הָעָם תְּרוּעָה גְּדוֹלָה וַיִּלָּחֲמוּ הָעִירָה וַיִּתְּפְשׂוּהָ, וַיָּבֹאוּ אִישׁ אֶל בֵּיתוֹ אֶל אִשְׁתּוֹ וְאֶל אֲשֶׁר לוֹ. וַיָּמֻתוּ בַּיּוֹם הַהוּא מֵעַם הָאָרֶץ אֶלֶף וּמֵאָה אִישׁ מִיּוֹשְׁבֵי הָעִיר, וּמֵעַם הַמָּצוֹר לֹא מֵת אֶחָד. וַיְהִי כִּרְאוֹת בִּלְעָם הַקּוֹסֵם כִּי נִלְכְּדָה הָעִיר, וַיִּפְתַּח הַשַּׁעַר וַיִּרְכַּב עַל הַסּוּס הוּא וּשְׁנֵי בָּנָיו, וַיָּנֻסוּ וַיָּבֹאוּ מִצְרַיִם אֶל פַּרְעֹה מֶלֶךְ מִצְרַיִם, הֵמָּה הַחַרְטֻמִּים הַמְּכַשְּׁפִים הַכְּתוּבִים בְסֵפֶר הַיָּשָׁר הַיּוֹעֲצִים אֶל פַּרְעֹה לְאַבֵּד שֵׁם יַעֲקֹב מֵעַל פְּנֵי הָאֲדָמָה. וַיִּלְכֹּד מֹשֶׁה אֶת הָעִיר בְּחָכְמָתוֹ, וַיּוֹשִׁיבֻהוּ עַל כִּסֵּא הַמְּלוּכָה, וַיָּשִׂימוּ כֶּתֶר מַּלְכוּת בְּרֹאשׁוֹ, וְגַם אֶת הַכּוּשִׁית הַגְּבִירָה נָתְנוּ לוֹ לְאִשָּׁה, וַיִּירָא מֹשֶׁה אֶת אֱלֹהֵי אֲבוֹתָיו וְלֹא בָּא אֵלֶיהָ כִּי זָכַר אֶת הַשְּׁבוּעָה אֲשֶׁר הִשְׁבִּיעַ אַבְרָהָם אֶת אֱלִיעֶזֶר עַבְדּוֹ לֵאמֹר, (בראשית כד, ג) "לֹא תִּקַּח אִשָּׁה לִבְנִי מִבְּנוֹת כְּנָעַן". וְגַם כֹּה עָשָׂה יִצְחָק בִּבְרֹחַ יַעֲקֹב מִפְּנֵי עֵשָׂו, וַיְצַוֵּהוּ וַיֹּאמֶר לוֹ, לֹא תִּתְחַתֵּן בִּבְנֵי חָם, כִּי זָכַרְנוּ אֶת אֲשֶׁר נָתַן אֶת בְּנֵי חָם לַעֲבָדִים לִבְנֵי שֵׁם וְלִבְנֵי יֶפֶת, וַיִּירָא מֹשֶׁה מִפְּנֵי ה' אֱלֹהָיו וַיִּתְהַלֵּךְ לְפָנָיו בֶּאֱמֶת בְּכָל לְבָבוֹ, וְלֹא סָר מִן הַדֶּרֶךְ אֲשֶׁר הָלְכוּ בָּהּ אַבְרָהָם יִצְחָק וְיַעֲקֹב, וַיִּתְחַזֵּק בְּמַלְכוּת בְּנֵי כּוּשׁ וַיִּלָּחֶם אֶת אֱדוֹם וְאֶת בְּנֵי קֶדֶם וְאֶת אֲרָם, וַיַּכְנִיעֵם תַּחַת יַד בְּנֵי כּוּשׁ. וְהַיָּמִים אֲשֶׁר מָלַךְ עַל בְּנֵי כּוּשׁ, אַרְבָּעִים שָׁנָה. וַיַּצְלַח בְּכָל מִלְחַמְתּוֹ, כִּי ה' אֱלֹהֵי אֲבוֹתָיו אִתּוֹ. בִּשְׁנַת אַרְבָּעִים לְמָלְכוֹ וְהוּא יוֹשֵב עַל כִּסֵּא הַמְּלוּכָה וְהַגְּבִירָה יוֹשֶׁבֶת לִימִינוֹ אֶצְלוֹ, וַתֹּאמֶר הַגְּבִירָה אֶל הַשָּׂרִים וְאֶל הָעָם, הִנֵּה זֶה אַרְבָּעִים שָׁנָה אֲשֶׁר מָלַךְ זֶה עַל כּוּשׁ, וְאֵלַי לֹא קָרַב, וְאֶת אֱלֹהֵי בְּנֵי כּוּשׁ לֹא עָבַד. וְעַתָּה שִׁמְעוּ נָא בְּנֵי כּוּשׁ וְלֹא יִמְלֹךְ עֲלֵיכֶם זֶה, הִנֵה מוּנְחָם בְּנִי יִמְלֹךְ עֲלֵיכֶם, כִּי טוֹב לָכֶם לַעֲבֹד אֶת בֶּן אֲדוֹנֵיכֶם מֵעֲבֹד אִישׁ נָכְרִי עֶבֶד מֶלֶךְ מִצְרַיִם. וַיְהִי כָּל הָעָם נָדוֹן עַד הָעֶרֶב, וַיַּשְׁכִּימוּ בַּבֹּקֶר וַיַמְלִיכוּ אֶת מוּנְחָם בֶּן קוֹקְנוּס עֲלֵיהֶם, וַיִּירְאוּ בְּנֵי כּוּשׁ לִשְׁלֹחַ יָד בְּמֹּשֶׁה, וְכִי זָכְרוּ אֶת הַשְּׁבוּעָה אֲשֶׁר נִשְׁבָּעוּ לוֹ, וַיִּתְּנוּ לוֹ מַתָּנוֹת גְּדוֹלוֹת וַיְשַׁלְּחֻהוּ בְּכָבוֹד גָּדוֹל, וַיֵּצֵא מִשָּׁם וַיַּחְדֹּל מִמְּלוֹךְ עַל כּוּשׁ. וּמֹשֶׁה בֶּן שֶׁבַע שָׁנִים וְשִׁשִּׁים שָׁנָה בְּצֵאתוֹ מִכּוּשׁ, כִּי מֵה' יָצָא הַדָּבָר כִּי בָּא הַקֵּץ אֲשֶׁר הִתְעַתֵּד מִימֵי קֶדֶם לְהוֹצִיא אֶת בְּנֵי יִשְׂרָאֵל. וַיֵּלֶךְ מֹשֶׁה מִדְיָנָה כִּי יָרֵא [לָשׁוּב] מִצְרַיְמָה מִפְּנֵי פַּרְעֹה, וַיָּבֹא אֶל רְעוּאֵל וַיְסַפֵּר לוֹ מֹשֶׁה אֶת אֲשֶׁר בָּרַח מִמִּצְרַיִם, וְאֶת אֲשֶׁר מָלַךְ עַל בְּנֵי כּוּשׁ, וְאֶת אֲשֶׁר לָקְחוּ מִמֶּנּוּ הַמְּלוּכָה וַיְגָרְשֻׁהוּ. וַיְהִי כִּשְׁמֹעַ רְעוּאֵל אֶת דְּבָרָיו, אָמַר בְּלִבּוֹ, אֶתְּנָה זֶה בֵּית הַכֶּלֶא וְאֵרָצֶה בּוֹ לִבְנֵי כּוּשׁ, כִּי נוֹסֵס הוּא, וַיִּקָּחֵהוּ אֶל בֵּית הַסֹּהַר וַיְהִי כָּלוּא שָׁם עֶשֶׂר שָׁנִים. וַיְהִי בִּהְיוֹתוֹ עָצוּר שָׁמָּה, וַתַּחְמֹל עָלָיו צִפֹּרָה בַּת רְעוּאֵל וַתְּכַלְכֵּלֵהוּ לֶחֶם וּמַיִם. וַיְהִי מִקֵּץ עֶשֶׂר שָׁנִים וַתֹּאמֶר אֶל אָבִיהָ לֵאמֹר, הָאִישׁ הָעִבְרִי אֲשֶׁר כְּלָאֲתוֹ זֶה עֶשֶׂר שָׁנִים בְּבֵית הַסֹּהַר וְאֵין דּוֹרֵשׁ וְאֵין מְבַקֵּשׁ אֵלָיו, וְעַתָּה אִם טוֹב בְּעֵינֶיךָ אָבִי, נִשְׁלַח וְנִרְאֶה אִם מֵת וְאִם חַי הוּא, וְאָבִיהָ לֹא יָדַע כִּי כִּלְכְּלָתְהוּ. וַיַּעַן וַיֹּאמַר רְעוּאֵל הֲנִהְיָה כַּדָּבָר הַזֶּה לְהֵעָצֵר גֶּבֶר בְּבֵית הַכֶּלֶא עֶשֶׂר שָׁנִים וְלֹא יֹאכַל וְיִחְיֶה. וַתַּעַן צִפֹּרָה אֶת אָבִיהָ לֵאמֹר, הֲלֹא שָׁמַעְתָּ [אָבִי] כִּי אֱלֹהֵי הָעִבְרִים גָּדוֹל וְנוֹרָא הוּא וּמַפְלִיא לָהֶם בְּכָל עֵת. הוּא הִצִּיל אַבְרָהָם מֵאוּר כַּשְׂדִּים, וְאֶת יִצְחָק מִן הַחֶרֶב, וְאֶת יַעֲקֹב מִן הַמַּלְאָךְ בְּהֵאָבְקוֹ עִמּוֹ. וְגַם עִם זֶה רַבּוֹת עָשָׂה וַיַּצִּילֵהוּ מֵיְאוֹר מִצְרַיִם, וּמֵחֶרֶב פַּרְעֹה, גַּם מִזֶּה יָכוֹל לְמַלְּטֵהוּ. וַיִּיטַב הַדָּבָר בְּעֵינֵי רְעוּאֵל וַיַּעַשׁ כֵּן כִּדְבַר בִּתּוֹ, וַיִּשְׁלַח אֶל הַבּוֹר לִרְאוֹת מַה נַּעֲשָׂה בּוֹ. וַיִּרְאוּ וְהִנֵּה הָאִישׁ חַי וְעוֹמֵד עַל רַגְלָיו וּמִתְחַנֵּן אֶל אֱלֹהֵי אֲבוֹתָיו. וַיּוֹצִיאוּהוּ מִן הַבּוֹר וַיְגַלְּחֻהוּ וַיְשַׁנּוּ אֶת בִּגְדֵי כִּלְאוֹ, וַיֹּאכַל לָחֶם. וַיֵּרֶד הָאִישׁ אֶל גִּנַּת רְעוּאֵל אֲשֶׁר אַחֲרֵי הַבַּיִת, וַיִּתְפַּלֵּל אֶל אֱלֹהָיו אֲשֶׁר עָשָׂה אִתּוֹ נִפְלָאוֹת רַבּוֹת. וַיְהִי בֶּהִתְפַּלְּלוֹ, וַיַּבֵּט בְּצִדּוֹ וְהִנֵּה מַטֵּה סַפִּיר מֻצָּב אַרְצָה וְהוּא נָטוּעַ בְּתוֹךְ הַגִּנָּה, וַיִּקְרַב אֶל הַמַּטֶּה וְהִנֵּה חָקוּק בּוֹ שֵׁם ה' אֱלֹהִים צְבָאוֹת כָּתוּב וּמְפֹרָשׁ עַל הַמַּטֶּה, וַיִּקְרָא בּוֹ, וַיִּתְלְשֵׁהוּ כְּהִתָּלֵשׁ עֵץ יַעַר מִסְּבָכוֹ וַיְהִי לְמַטֶּה בְּכַפּוֹ. וְהוּא הַמַּטֶּה הַנִּבְרָא בְּתֵבֵל מִפְעֲלוֹת אֱלֹהִים אַחֲרֵי בּוֹרְאוֹ שָׁמַיִם וָאָרֶץ וְכָל צְבָאָם, יָמִים וּנְהָרוֹת וְכָל דְּגָתָם. וַיְהִי בְּהִגָּרֵשׁ אָדָם מִגַּן עֵדֶן, וַיִּקַּח אֶת הַמַּטֶּה בְּיָדוֹ וַיֵצֵא וַיַּעֲבֹד אֶת הָאֲדָמָה אֲשֶׁר לֻקַּח מִשָּׁם, וַיַּגִּיעַ הַמַּטֶּה עַד נֹחַ וַיִוָתֵר אֶל שֵׁם וְאֶל תּוֹלְדוֹתָיו עַד הַגָּעָתוֹ אֶל יְדֵי אַבְרָהָם הָעִבְרִי, (בראשית כה, ה) "וַיִּתֵּן אַבְרָהָם אֶת כָּל אֲשֶׁר לוֹ לְיִצְחָק", גַּם אֶת מַטֶּה הָאוֹתִיּוֹת יָרוֹשׁ יָרַשׁ. וַיְהִי כִּבְרוֹחַ יַעֲקֹב פַּדֶּנָה אֲרָם, וַיִקָּחֵהוּ בְּיָדוֹ, וּבְבוֹאוֹ אֶל יִצְחָק אָבִיו בְּאֵרָה שָׁבַע, נָטוֹשׁ לֹא נְטָשׁוֹ, וּבְרִדְתוֹ מִצְרַיְמָה לְקָחוֹ בְּיָדוֹ וַיִתְּנֵהוּ אֶל יוֹסֵף שְׁכֶם אֶחָד עַל אֶחָיו, כִּי בְּאָמְצוֹ לְקָחוֹ יַעֲקֹב מִיַּד עֵשָׂו אֲבִי אֱדוֹם. וַיְהִי אַחֲרֵי מוֹת יוֹסֵף וַיֵשְׁבוּ שָׂרֵי מִצְרַיִם בֵּית יוֹסֵף, וַיַּגִּיעַ הַמַּטֶּה אֶל יַד רְעוּאֵל הַמִּדְיָנִי, וּבְעֵת צֵאתוֹ מִמִּצְרַיִם לְקָחוֹ בְּיָדוֹ וַיִטָעֵהוּ בְּתוֹךְ גִּנָּתוֹ. וַיִּבָּחֲנוּ כָּל גִּבּוֹרֵי קֵינִי לְתוֹלְשׁוֹ, בְּבַקְּשָׁם לָקַחַת צִפֹּרָה בִּתּוֹ וְלֹא יָכְלוּ, וַיִשָּׁאֵר בְּתוֹךְ הַגַּן עַד בֹּא אֲשֶׁר לוֹ הַמִּשְׁפָּט וַיִקָּחֵהוּ. וַיְהִי כִּרְאוֹת רְעוּאֵל אֶת הַמַּטֶּה בְּיָדוֹ וַיִּתְמַהּ עַל כָּכָה, וַיִּתֵּן רְעוּאֵל צִפֹּרָה בִּתּוֹ לְמֹשֶׁה. וּמֹשֶׁה בֶּן שֶׁבַע שָׁנִים וְשִׁבְעִים שָׁנָה בְּצֵאתוֹ מִבֵּית הַסֹּהַר וַיִקַּח צִפֹּרָה הַמִּדְיָנִית לְאִשָּׁה וַתֵּלֶךְ צִפֹּרָה בְּדַרְכֵי בְּנֵי יִשְׂרָאֵל לֹא חִסְּרָה דָּבָר מִצִּדְקַת שָׂרָה וְרִבְקָה רָחֵל וְלֵאָה גִּבְעוֹת עוֹלָם, וַתַּהַר בֶּן וַיִּקְרָא מֹשֶׁה שְׁמוֹ גֵּרְשֹׁם וְגוֹ', רַק לֹא מָל אֶת בְּשַׂר עָרְלָתוֹ בִּגְזֵרַת רְעוּאֵל חוֹתְנוֹ, וַיְהִי בָּעֵת הַהִיא מִקֵּץ שָׁלֹשׁ שָׁנִים וַתַּהַר עוֹד וַתֵּלֶד בֶּן שֵׁנִי, וַיָּמָל אֶת בְּשַׂר עָרְלָתוֹ וַיִּקְרָא שְׁמוֹ אֱלִיעֶזֶר וְגוֹ'.
2